جعفر عباس يكتب: داني ناري والتياعي

يوميات علوب (بقلم البارع الطيب عبد الماجد)
(هذا نص طويل ولكن وعندما تقرأه ستتمنى لو يطول كمان وكمان)
قالت لي ما عافيه منك يا ( التاج ) كان ما جبتا لي ولدك أشوفو بي عيني دي قبل اموت، كلمات حاسمة من ( دار الجلال ) والدة ( التاج ) المقيم في بريطانيا منذ عقود وقد تزوج بحسناء إيرلندية انجب منها ( داني ) وانفصلا قبل سنوات طويلة وغادرت وتركت له ( داني ) وفتيل ريحة ومشط
وكان ان سافرا ووصلا مطار الخرطوم- وطلعو بره لقو أهل ( التاج ) ديل اتلملمو من كل فج عميق وهجم عليهم القوم والتاج من حضن لي حضن ( وداني ) إفتكر إنو أبوهو دا جاب قون، واخت التاج الكبيرة ( علوية ) دي حضنتو وبكت لمن الله غفر ليها ..وتقول ليهو بركة الشفناك يالتاج قبل ما نموت وهو يقول ليها ليها بعد الشر عليك لسا شباب يا ( علوية ) هسا دا دهب زول داير يموت ( في إشارة لي غويشاتا ) وينفقعوا ليك بالضحك وسط كل هذه الدموع وداني لم يكن في أعلى سقف تصوراته أنو يشوف بيت البكا المفتوح في نص المطار دا ( الود دخلتو خلعة ……والأمة مجتمعة …!! ياخ الولد دا ملخو ليهو يدينو
واحد كمان من المنظراتية الحايمين في المطار ديل قال للتاني: شوف شوف قالو دا المحترف بتاع المريخ الجديد ( في إشارة لداني لأنه ( داني جا بي لبسة رياضيه) وداك طوالي صورو …ووثق اللحظة وهسا بكون لافي في القروبات …..!!!!
ا المهم كلهم مشو على البيت ….و ( دار الجلال ) بكل جلالها مافي اي فرق بينها وبين ( اليزابيث ) ( الكوين سوى فارق التوقيت! دخلت ليك في احضان السنين مع ولدا التاج تشم فيهو شم وقبلت ليك علي ( داني ) وداني طبعًا وبحكم هذا الهجين بين الدوري الإنجليزي والسوداني دا شعرو خشن لكن طويل ومفلفل والعيون خدر ….لكن ياهن ( شلاليفنا ) و حبوبتو شبكتو ليك: تعال لي ….تعال لي يا حشاي ( حشاي دي كان ترجموها ليهو كان رجع ) وا حلاتي وا حلاتي …وطبعا هو يعجبك …لوح التلح بسيح ….( داني ) ما ساح ( حق أمو كلو )، ولا كأنو في زول بسلم عليهو ( قطعو فيهو ( بوسه ) قشاها في محلتا
وطبعا بحكم زيارة الخواجة الصغير دا مفضيين ليهو أوضة براهو .. داني يشيل ويعاين في الأوضة ويستكشف المكان شويه كدا وكورك ليك لي ابوهو: دااااااد ..أخت( التاج ) دي لذيذه كدا قالت يالرسول دا مالو …..شرق ….!!( بكسر الشين ) ( التاج ) مشي ليهو ودخلو في مباحثات كدا اتضح إنو ( داني ) يفتش للدفاية أبوهو مات من الضحك قال ليهو ( دفاية ) شنو يا ولدي هنا في ( قلاية ).. وشرح ليهو إنو نحن مناخنا استوائي ومداري بس دسو منو الكتاحة ….!!! أول ما صحى الصباح جابو له الشاي ببسكويت بركة، معطو زي الما حصلت حاجة الحاجة الوحيدة الفاتت عليهو ما غمز البسكويت دا في الشاي …!!!
زولك شرب الشاي وسجل اعتراض على الموية ..دايرا في قارورة قايل نفسو كتشنر المهم جابو المويه المعبية والأمور تمام والناس داخلين ومارقين يسلمو على التاج وولدو وكت حسا انهم كترو قال لي أبوهو إنتا البيت دا فيهو مهرجان
وطبعا ضبحو ليك للتاج ديك يا الكرامة وهو عارف القصة دي لو شافا الولد دا ممكن تؤدي لصدمة فتم إخفاء عملية الذبح وما بعدها بشكل كامل … وغسلو الدم …ومسحو كل آثار الجريمة بعد دا كلو ( داني ) لقى الجلد مكوم في نص الحوش … سأل أبوهو قال ليهو دا شنو ؟ فاضطر الأخير للكذب ….قال ليهو دا عمل فني اسمو ( صائد الغزلان ) احتجاجاً علي هذه العمليه البشعة وطبعاً ناس ( داني ) ديل بصدقو أي حاجه…..فعبر عن إعجابو وقال هو (براود) بالعمل دا …و يشيل ويصور في الجلد ماعارف الضباح شال الراس للعشا العجب لو عرف انو اسمو ( الباسم ) كان الضحك شرطو
أها تاني يوم جن بنات أخوات التاج ديل عندو اختو متزوجة دكتور كدا مرتاحين ساكنين في المعمورة والبنات ذاتن ستايل كدا ومدارس انجليزية وحركات أها جن يسلمو على خالم دا وولدو .. الصغيرة دي أول ما شافتو مع ( البوب ) دا وبنطلون الجينز المسهوك في الركبة طوالي غردت: واااااو … هي إز ساووو. هاندسم – ( غايتو حبوبتا لو عرفتا قالت شنو ……كان نفضتا ) بعد دا ( داني ) فرا خشمو ….أخيراً لقي ليهو زول عبر بالإنجليزي يازول البنات ديل سلكن معاهو زي العجب
داني ) ما بياكل لحمة وكل محاولات تناول الملاح باءت في الفشل بس مبسوط انو في ملاح اسمو ( ثلج ) قايلو ( سنو ) snow مدور ليك في البسكويت وبيرغر فراخ ومشو بيهو رحلة ( جبل أوليا ) عازمنو سمك وهو طبعًا الصراحة كاتلا …قال لي أبوهو دي شنو الوساخة دي …في إشارة للقمامة المردومةً علي امتداد الشريط الحدودي للزلط ( ياخ نحنا ذاتنا مستغربين خلي داني ) قالو ليهو دي عايزين يعملو ليها ( ري سايكلنغ ) بالطاقة الشمسية قالو ما بعملو ليهو إحباط من أرض الجدود ( ارض الحدود فترت والله ) بعد ما جو راجعين زي الساعة تمنية كدا ( طق ) الكهربا قطعت وداني قال خاف يكون بقي عميان ردت ( اليزابيث ) بعبارات مقتضبه: وحات نظري التاج ولدي دا ولدو “ني”- يعني وحبوبتو ذاتا قنعت من خيراً فيهو وهو طبعًا أصلاً جايبنو على شرفا
يحنسو فيهو تحنيس كل يوم إنو يمشي يصبح عليها، يجيها ليك من هناك يتجرجر يشبكا ليك ( قود مورننغ ) ( لاوي بوزو ) والوش صاري ولا بعاين ليها ذاتو هي ذاتا بتقصر بت المكوك: تصبح قرد يالمسيخ ….!! غايتو التاج ولدي دا ما عندو ولادة
طبعًا ( داني ) دا بحب الكورة شديد وبشجع تشيلسي موت ..وهو ذاتو لعاب والله، المهم أبوهو لبسو قال يتمرن مع شفع الحلة يازول جا لابس ليك لبسة البلوز دي بالكحلي كيف والجزمة تلمع والشرابات يمين الجماعة ا تقول جاهم ( نيمار ) والصور دي تتطاقش والسيلفي …!! ناس ( الكجم ) جو جارين جري بس متابعين ليك الزول دا …( الكجم ) حايم جنبو يتحكحك ويجرجر في بنطلونو الطوالي ناصل دا ..جا جنبو كدا قال ليهو …ما عندكم قروش . الله يفضحك يا ( كجم ياخ كان فضحتنا مع الأجانب …) هم تلاته كدا مع المجرم دا يشيلو ويعاينو لي الولد دا ويعاينو لي بعض وميتين بالضحك …خاصة لما يتكلم إنجليزي … ( البلاي ستيشن الماشافوها دي الليله جاتم شخصياً ) غايتو الجماعة اول يوم بشوفو الدوري الإنجليزي دا ( لايف ) وهو ذاتو ما قصر أداهم كم حركة كدا
وخلصت الإجازة واستعدو للعودة ونفس الناس جو في الاستقبال جو في الوداع مع الجيران والحبان وجابو الهدايا لي داني وأحاطوه بالحنان اخوات التاج دقو ليهو البهارات والدكوة!
وهم في الطيارة قال لي أبوهو ليه الناس ديل طيبين شديد كدا وعطوفين وطواااالي بسلمو علي بعض ….!! (? Why are these people so nice and kind )
التاج عاين بالشباك كان ليهو مراد ينزل …!! قال ليه عشان كدا أنا جبتك
مع السلامة يا التاج إن شاء الله نتلاقى في ساعة خير ونورتنا يا ( داني ) وهل من عودة تاني ..!!!!