“سلام آناس”.
سلام آناس سلام مطبوق من العاشق إلى المعَشُوق
سلام يغَشى الديار بيت بيت ولي نخلاتنا والواسوق
سلام للماتوا والحَيين والمُصلايتو هي التَبَروق
سلام تربال مع الحيضان و واقفة طيورو فوق كَرُّوق
سلام طورية لللّبقة حُضُن نسقيبو نحن الرُوق
سلام للحشَ برسيمو ومشَدِد ماشي طالع فوق
سلام للقاموا من النجمة شالوا خدار وقصدوا السوق
سلام بت حواء فوق لي راسه واقوداً يلاحق النوق
سلام للعايسة قراصة وماسحة الدوكة بالطايوق
سلام ست الكرم والزوق مملِحة ليها بي سَبَرُوق
سلام للقُمري والبِرقيط طيور الجَني ست الطوق
سلام لَلفي ضَهَر حاحاية هازّي حبالهَ قبلِ شِروق
سلام يَغَشى البَهَم في البيت البي وِتِدو والمطلوق
سلام لي كل كائن حي يَوصَل يدي مني الشوق
د.ضياء الدين أحمد عوض الله محمد.